1-я Паралипоменон 11

И собрася весь Израиль к Давиду в Хеврон, глаголюще: се, кости твоя и плоть твоя мы:

вчера же и третияго дне, егда еще царствоваше Саул, ты был еси изводяй и вводяй Израиля, и тебе рече Господь Бог твой: ты упасеши люди Моя Израиля, и ты будеши князь над людьми Моими Израилем.

И приидоша вси старейшины Израилевы ко царю в Хеврон: и утверди Давид с ними завет в Хевроне пред Господем: и помазаша Давида в царя над Израилем по словеси Господню, (еже глагола) рукою Самуиловою.

И иде царь Давид и весь Израиль во Иерусалим, сей есть Иевус, идеже бяху Иевусее жителие земли.

Рекоша же Давиду, иже обиташа в Иевусе: не внидеши семо. И взя Давид крепость Сионю, яже есть град Давидов.

Рече же Давид: всяк иже убиет Иевусеа в первых, будет князь и воевода. И взыде нань прежде Иоав сын Саруиев и бысть князем.

И седе Давид во обдержании: сего ради именова е град Давидов.

И созда град окрест от Маала даже да окружения: Иоав же прочее града сострои: и воева и взя град.

Преспеваше же Давид идый и растый, и Господь Вседержитель бе с ним.

Сии же князи сильных Давидовых, иже помогаху ему в царстве его со всем Израилем, да царь будет по словеси Господню, над Израилем,

и сие число крепких Давидовых: Иесваал сын Ахамань, первый между тридесятми: той извлече мечь свой единожды на триста язвеных во едино время.

И по нем Елеазар, сын Додеа Ахохии: сей бе между треми сильными:

сей бе с Давидом в Фасодомине, идеже иноплеменницы собрани быша на брань, и бе часть нивы полна ячменя, и людие побегоша от лица иноплеменнича:

и ста посреде части и защити ю, и изби иноплеменники, и сотвори Господь спасение велие (людем Своим).

Снидоша же тии трие от тридесяти князей на камень ко Давиду в пещеру Одолламлю, а полк иноплеменничь стояше во юдоли Гигантов.

Давид же бе тогда в крепости, полк же иноплеменничь бе тогда в Вифлееме.

И возжада Давид и рече: кто напоит мя водою от кладязя Вифлеемска, иже есть во вратех?

И трие тии проторгошася сквозе полк иноплеменничь и почерпоша воду из кладязя, иже в Вифлееме, иже бе во вратех, и взяша и принесоша к Давиду, да пиет. И не восхоте Давид пити ея и возлия ю Господеви

и рече: милостив ми Бог, еже сотворити глагол сей: аще кровь мужей сих испию в душах их, понеже душами своими принесоша. И не восхоте пити ея. Сие сотвориша трие сильнии.

И Авесса брат Иоавль, той бе первый в триех: сей извлече мечь свой противу триех сот мужей во един час и уби их, и той бе посреде триех именит:

от триех между двема преславный, и бе им началник, обаче ко трием первым не достиже.

И Ванеа сын Иодаев, сын мужа крепкаго, многа дела его, от Каваслила: той уби двоих Ариилов Моавских, и той сниде и уби льва у кладязя во время снега:

и той уби мужа Египтянина, емуже возраст бе пять лакот, и в руце Египтянина копие яко вратило ткущих: и сниде к нему Ванеа с жезлом, и восхити копие из руки Египтянина и уби его копием его:

сия сотвори Ванеа сын Иодаев, и бе именит посреде триех сильных:

над тридесятию бе славен сей, а ко трием не достиже: и постави его Давид над отечеством своим.

И сильнии сил: Асаил, брат Иоавль, Елеанан, сын Додоев от Вифлеема,

Саммоф Аддитянин, Хелкий Афелонин,

Орей сын от Киса Фекуйский, Авиезер Анафофский,

Совохай Асофийский, Илий Ахойский,

Воорай сын Нетофафиев, Еллаф сын Ваинака Нетофафийскаго,

Ифай сын Ривеин от холма Вениаминя, Ванеа сын Фарафониев,

Урий от Неали, Галсавиил Аравефийский,

Азмоф Варсамийский, Елиава Саламийский,

Ирас Гоинийский, Ионафан сын Саги Арарийский,

Ахиам сын Сахара Арарийскаго, Зифаал сын Орин,

Афер Мехурафинский, Ахиа Фелонийский,

Асарай Мармелинский, Ноорай сын Авдиев,

Иоиль брат Нафанов, Мавар сын Тараиев,

Селлик Аммониин, Наарей Вирофин, иже носил оружие Иоава сына Саруиева,

Ира Иефериин, Гарив Фериин,

Уриа Хетфейский, Вазаф сын Оолиев,

Адина сын Саха, Рувима князь, и у него тридесять,

Анан сын Маахин, и Иосафат Фафаин,

Озиа Астарофин, Самма и Иеил сынове Хофана Арариина,

Иедиил сын Саамерин, и Иозае брат его Фосаин,

Иелиил Маоин, и Арива, и Осоиа сын его, Енаам, и Иефема Моавитский,

Елиил, и Овид, и Иесиил Месовиев.