Даниил 13

И бе муж живый в Вавилоне, имя же ему Иоаким.

И поя жену, ейже имя Сосанна, дщерь Хелкиева, добра зело и боящися Бога.

Родителя же ея праведна, и научиста дщерь свою по закону Моисеову.

Бе же Иоаким богат зело, и бе ему вертоград близ двора его: и схождахуся к нему Иудее, понеже той бяше славнее всех.

И избрана быста два старца от людии в судии в то лето, о нихже глагола Владыка, яко изыде беззаконие из Вавилона от старец судий, иже мняхуся управляти людий.

Сия прихождаста часто в дом Иоакимль, и прихождаху к нима вси прящиися.

И бысть, внегда отхождаху людие о полудни, вхождаше Сосанна и хождаше во вертограде мужа своего.

И смотряста ея оба старца по вся дни входящую и исходящую, и быста в похотении ея,

и развратиста ум свой, и уклоноста очи свои, еже не взирати на небо, ниже поминати судеб праведных.

И беста оба уязвлена похотию на ню, и не возвестиста дру другу болезни своея,

понеже стыдястася исповедати вожделение свое, яко хотяста быти с нею.

И наблюдаста жадающа по вся дни зрети ю, и реста друг ко другу:

пойдем убо в дом, яко обеда час есть. И изшедша разыдостася друг от друга,

и возвращшася приидоста во едино (место), и истязавша друг от друга вины, исповедаста друг другу похотение свое, и тогда обще устависта время, когда возмогут оную обрести едину.

И бысть егда наблюдаста дне угоднаго, вниде Сосаниа, якоже вчера и третияго дне, со двема точию отроковицами, и восхоте мытися во вертограде, яко зной бяше.

И не бяше никогоже тамо, кроме двою старцев сокровенных и стрегущих ея.

И рече отроковицам: принесите ми масло и мыло и двери вертоградныя затворите, да измыюся.

И сотвористе якоже рече, и затвористе двери вертоградныя, и изыдосте задними дверьми принести повеленное има, и не видесте старцев, понеже бяста сокровенна.

И бысть, егда изыдосте отроковицы, востаста оба старца, и текоста к ней, и реста:

се, двери оградныя затворишася, и никтоже видит нас, а в похотении твоем есмы: сего ради соизволи нам, и буди с нами:

аще же ни, то послушествуем на тя, яко бе с тобою юноша, и того ради отпустила еси отроковиц от тебе.

И возстена Сосанна и рече: тесно ми отвсюду: аще бо сие сотворю, смерть ми есть: аще же не сотворю, не избегну от рук ваших:

изволение ми есть не сотворившей впасти в руце ваши, нежели согрешити пред Богом.

И возопи гласом великим Сосанна: возописта же и оба старца противу ей,

и тек един, отверзе двери вертоградныя.

Егда же услышаша кличь во вертограде домашнии, вскочиша задними дверьми видети случившееся ей.

Егда же поведаста старцы словеса своя, устыдешася раби ея зело, яко николиже речеся таково слово о Сосанне.

И бысть наутрие, егда собрашася людие к мужу ея Иоакиму, приидоста и оба старца полна беззаконнаго помышления на Сосанну, еже уморити ю,

и реста пред людьми: послите по Сосанну дщерь Хелкиеву, яже есть жена Иоакимля. Они же послаша.

И прииде та и родителя ея, и чада ея и вси ужики ея.

Сосанна же бяше млада зело и добра образом.

Беззаконнии же повелеста открыти ю, бяше бо покровена, яко да насытятся доброты ея.

Плакаху же сущии при ней и вси знающии ю.

Воставша же оба старца посреде людий, возложиста руце на главу ея.

Сия же плачущи воззре на небо, яко бяше сердце ея уповая на Господа.

Реста же оба старца: ходящым нам обоим во вертограде, вниде сия со двема отроковицами, и затвори двери вертоградныя, и отпусти отроковицы,

и прииде к ней юноша, иже бяше сокровен, и возлеже с нею:

мы же суще во угле вертограда, видевше беззаконие, текохом на ня:

и видевше их смешающихся, онаго убо не могохом яти понеже паче нас можаше, и отверз двери вертоградныя изскочи:

сию же емше, вопрошахом, кто бе юноша? И не восхоте поведати нам: о сем послушествуем.

И верова има сонм аки старцем людским и судиям, и осудиша ю на умертвие.

И возопи Сосанна гласом великим и рече: Боже вечный и сокровенных ведателю, сведый вся прежде бытия их!

Ты веси, яко лжу послушествоваста на мя, и се, умираю, не сотворши ничесоже, о нихже сии слукавноваста на мя.

И послуша Господь гласа ея,

и ведомей ей на погубление, воздвиже Бог духом святым отрока юна, емуже имя Даниил:

и возопи гласом великим: чист аз от крове сея.

Обратишажеся вси людие к нему и реша: что слово сие, еже ты глаголеши?

Сей же став среде их рече: сице ли юродиви, сынове Израилевы, не испытавше, ни истины разумевше, осудисте дщерь Израилеву?

Возвратитеся на судище: лжу бо сии послушествоваста на ню.

И возвратишася вси людие с потщанием. И реша ему старцы: гряди, сяди посреде нас и возвести нам, яко тебе даде Бог старейшинство.

И рече к ним Даниил: разведите я друг от друга далече, и вопрошу их.

Егда же разведоша единаго от другаго, призва единаго от них и рече к нему: обетшалый злыми денми, ныне приспеша греси твои, яже творил еси прежде,

судя суды неправедны и неповинныя убо осуждаж, прощая же повинныя, глаголющу Богу: неповинна и праведна не убивай:

ныне убо сию аще еси видел, рцы, под киим древом видел еси их беседующих к себе? Он же рече: под терном.

Рече же Даниил: право солгал еси на твою главу: се бо, Ангел Божий приим ответ от Бога, расторгнет тя полма.

И отпустив его повеле привести другаго и рече ему: племя Ханаане, а не Иудино, доброта прельсти тя, и похотение разврати сердце твое:

сице творили есте дщерем Израилевым, оныя же бояшяся живяху с вами, но (ныне) дщерь Иудина не претерпе беззакония вашего:

ныне убо глаголи ми: под киим древом видел еси сих беседующих к себе? Он же рече: под чресминою.

Рече же ему Даниил: право солгал еси и ты на свою главу: ждет бо Ангел Божий мечем разсещи тя полма, яко да потребит вы.

И возопи весь сонм гласом великим и благослови Бога спасающаго надеющыяся на Него.

И восташа на оба старца, яко обличи их Даниил от уст их, лжу послушествовавших.

И сотвориша има якоже слукавноваста ближнему, сотворити по закону Моисеову: и убиша их, и спасеся кровь неповинна в той день.

Хелкиа же и жена его похвалиша Бога о дщери своей Сосанне со Иоакимом мужем ея и со ужиками всеми, яко не обретеся в ней студная вещь.

Даниил же бысть велик пред людьми от дне того и потом.