Иов 27

Еще же приложив Иов, рече в притчах:

жив Господь, иже ми сице суди, и Вседержитель, Иже огорчи ми душу:

дондеже еще дыхание мое есть и дух Божий сущий в ноздрех моих,

не возглаголют устне мои беззакония, ниже душа моя поучится неправде.

Не буди мне правдивыми нарещи вас, дондеже умру: не изменю бо незлобия моего.

Правде же внимая, не оставлю ея, не свем бо себе злых соделавша.

Обаче же, дабы были врази мои, якоже низвращение нечестивых, и востающии на мя, якоже пагуба пребеззаконных.

И кая бо есть надежда нечестивому, яко ожидает? Надеяся на Господа спасется ли?

Или мольбу его услышит Бог? Или нашедшей ему беде,

еда имать кое дерзновение пред Ним? Или яко призвавшу ему, услышит ли Его?

Сего ради возвещу вам, что есть в руце Господни, и, еже есть у Вседержителя, не солжу.

Се, вси весте, яко тщетная ко тщетным прилагаете.

Сия часть человека нечестиваго от Господа: и жребий сильных приидет от Вседержителя на ня.

Аще мнози будут сынове их, на заколение будут: аще же и возмужают, нищы будут:

оставшиися же ему смертию умрут, и вдовиц их никтоже помилует.

Аще соберет якоже землю сребро, и якоже брение уготовит злато,

сия вся праведнии одержат, имения же его истиннии возмут:

будет же дом его яко молие, и яко паучина, яже снабде.

Богатый уснет и не приложит, очи свои отверзе, и несть.

Обыдоша его якоже вода болезни, нощию же ят его примрак.

Возмет же его вар, и отидет, и возвеет его от места его,

и вержет на него, и не пощадит, из руку его бежанием побежит:

восплещет нань рукама своима и с шумом возмет его от места своего.