К Евреям 13

Братолюбие да пребывает:

страннолюбия не забывайте, тем бо не ведяще нецыи странноприяша Ангелы.

Поминайте юзники, аки с ними связани: озлобляемыя, аки и сами суще в теле.

Честна женитва во всех и ложе нескверно: блудником же и прелюбодеем судит Бог.

Не сребролюбцы нравом, доволни сущими. Той бо рече: не имам тебе оставити, ниже имам от тебе отступити:

яко дерзающым нам глаголати: Господь мне помощник, и не убоюся: что сотворит мне человек?

Поминайте наставники вашя, иже глаголаша вам слово Божие: ихже взирающе на скончание жителства, подражайте вере (их).

Иисус Христос вчера и днесь Тойже, и во веки.

В научения странна и различна не прилагайтеся: добро бо благодатию утверждати сердца, (а) не брашны, от нихже не прияша пользы ходившии в них.

Имамы (же) олтарь, от негоже не имут власти ясти служащии сени.

Ихже бо кровь животных вносится во святая за грехи первосвященником, сих телеса сжигаются вне стана:

темже Иисус, да освятит люди Своею Кровию, вне врат пострадати изволил.

Темже убо да исходим к Нему вне стана, поношение Его носяще:

не имамы бо зде пребывающаго града, но грядущаго взыскуем.

Тем убо приносим жертву хваления выну Богу, сиречь плод устен исповедающихся имени Его.

Благотворения же и общения не забывайте: таковыми бо жертвами благоугождается Бог.

Повинуйтеся наставником вашым и покаряйтеся: тии бо бдят о душах ваших, яко слово воздати хотяще: да с радостию сие творят, а не воздыхающе, несть бо полезно вам сие.

Молитеся о нас: уповаем бо, яко добру совесть имамы, во всех добре хотяще жити.

Лишше же молю, сие творите, да вскоре устроюся вам.

Бог же мира, возведый из мертвых Пастыря овцам великаго Кровию завета вечнаго, Господа нашего Иисуса Христа,

да совершит вы во всяцем деле блазе, сотворити волю Его, творя в вас благоугодное пред Ним Иисус Христом: Емуже слава во веки веков. Аминь.

Молю же вы, братие, приимите слово утешения: ибо вмале написав послах вам.

Знайте брата нашего отпущена Тимофеа, с нимже, аще скорее приидет, узрю вас.

Целуйте вся наставники вашя и вся святыя. Целуют вы иже от Италии сущии.

Благодать со всеми вами. Аминь.