Левит 26

Не сотворите себе (образов) рукотвореных, ниже изваяных, ниже столпа поставите себе, ниже камене поставите в земли вашей во знамение, ко еже покланятися ему: Аз есмь Господь Бог ваш.

Субботы Моя сохраните, и от святых Моих убойтеся: Аз есмь Господь.

Аще в повелениих Моих ходите, и заповеди Моя сохранитеи сотворите я:

и дам дождь вам во время свое, и земля даст плоды своя, и древеса селная отдадят плод свой:

и постигнет вам млачение (жит) обрание вина, и обрание вина постигнет сеятву, и снесте хлеб ваш в сытость, и вселитеся с твердостию на земли вашей, и рать не пройдет сквозе землю вашу:

и дам мир в земли вашей, и уснете, и не будет устрашаяй вас: и погублю звери лютыя от земли вашея:

и рать сквозе землю вашу не пройдет, и поженете враги вашя, и падут пред вами убиением:

и поженут от вас пять сто, и сто вас поженет тмы, и падут врази ваши пред вами мечем:

и призрю на вас и благословлю вас, и возращу вас и умножу вас, и поставлю завет Мой с вами:

и снесте ветхая и ветхая ветхих, и ветхая от лица новых изнесете:

и поставлю завет Мой в вас, и не возгнушается душа Моя вами:

и похожду в вас, и буду вам Бог, и вы будете Ми людие:

Аз есмь Господь Бог ваш, изведый вас из земли Египетския, сущым вам рабом: и сокруших узы ярма вашего, и изведох вас со дерзновением.

Аше же не послушаете Мене, ниже сотворите повелений Моих сих,

но ни покоритеся им, и о судбах Моих вознегодует душа ваша, яко не творити вам всех заповедий Моих, яко разорити завет Мой,

и Аз сотворю сице вам, и наведу на вас скудость и красту, и желтяницу вреждающую очи ваша и душы вашя истаевающую: и посеете вотще семена ваша, и поядят я супостаты вашя:

и утвержу лице Мое на вас, и падете пред враги вашими, и поженут вы ненавидящии вас, и побегнете ни комуже гонящу вас.

И аще до сего не послушаете Мене, и приложу наказати вы язвами седмижды за грехи вашя:

и сокрушу досаждение гордыни вашея, и положу небо вам аки железно, и землю вашу аки медяну:

и будет вотще крепость ваша, и не даст земля ваша семене своего, и древа села вашего не дадут плода своего.

И аще по сих пойдете страною и не восхощете послушати Мене, приложу вам язв седмь по грехом вашым,

и послю на вы звери лютыя земныя, и изядят вы и потребят скоты вашя, и умалены сотворю вы, и пусты будут путие ваши.

И аще сими не накажетеся, но пойдете ко Мне страною,

пойду и Аз с вами в ярости страною, и поражу вы и аз седмижды грех ради ваших,

и наведу на вы мечь мстяй месть завета, и вбегнете в грады вашя: и послю на вы смерть, и предани будете в руце враг ваших:

внегда скорбети вам скудостию хлебов, и испекут десять жен хлебы вашя в пещи единей, и отдадят хлебы вашя весом, и ясти будете, и не насытитеся.

Аще же в сих не послушаете Мене и пойдете ко Мне страною,

и Аз пойду с вами в ярости страною, и накажу вы аз седмижды по грехом вашым:

и ясти будете плоти сынов ваших, и плоти дщерей ваших ясти имате,

и сотворю пустая капища ваша и потреблю древяная рукотворения ваша, и положу трупы вашя на трупех кумир ваших, и возненавидит вас душа Моя:

и сотворю грады вашя пусты, и опустошу святая ваша, и не обоняю вони жертв ваших:

и сотворю пусту аз землю вашу, и удивятся о ней врази ваши, живущии на ней:

и разсыплю вы в языки, и потребит вы находяй мечь, и будет земля ваша пуста, и грады ваши будут пусты.

Тогда возблаговолит земля субботы своя, во вся дни запустения своего, и вы будете в земли враг ваших: тогда воспразднует земля и возблаговолит субботы своя:

во вся дни опустения своего воспразднует, яже не празднова в субботах ваших, егда живясте на ней.

И оставльшымся от вас вложу страх в сердца их в земли враг их, и поженет их глас листа летяща, и побегнут яко бежащии от рати, и падут ни кимже гоними.

И презрит брат брата аки на рати, ни кому нападающу, и не возможете противустати врагом вашым:

и погибнете в языцех, и потребит вас земля враг ваших.

И оставльшиися от вас истлеют за грехи своя и за грехи отец своих, в земли враг своих истают,

и исповедят грехи своя и грехи отец своих, яко преступиша и презреша Мя, и яко ходиша предо Мною страною:

и Аз пойду с ними в ярости страною и погублю их в земли врагов их: тогда усрамится сердце их необрезаное и тогда познают грехи своя::

и помяну завет Иаковль и завет Исааков, и завет Авраамль помяну,

и землю помяну, и земля останется от них. Тогда приимет земля субботы своя, внегда опустети ей их ради: и они приимут своя беззакония, ихже ради презреша судбы Моя, и о повелениих Моих вознегодова душа их:

обаче сущым им в земли врагов своих, не презрех их, ниже вознегодовах о них, яко потребити я и разорити завет Мой иже к ним: Аз бо есмь Господь Бог их.

И помяну завет их первый, егда изведох их из земли Египетския, из дому работы пред языки, еже быти Мне Богу их: Аз есмь Господь.

Сия судбы Моя и повеления Моя, и закон, егоже даде Господь между Собою и между сыны Израилевы, на горе Синайстей, рукою Моисеовою.