Премудрость Иисуса, сына Сирахова 32

Старейшину ли тя поставиша, не возносися, но буди в них яко един от них:

попецыся ими, и тако сяди. И всю потребу твою сотворив возлязи,

да возвеселишися их ради и красоты ради приимеши венец.

Глаголи, старейшино, подобает бо ти,

испытною хитростию и не возбрани мусикии:

идеже слушание (будет), не изливай беседы и без времене не мудрися.

Печать анфракса на украшении злате, и сладкогласие мусикиев в пиршестве вина.

Во украшении златем печать смарагдова, сладкопение мусикиев по сладцем вине.

Глаголи, юноше, аще тебе есть потреба, едва дващи, аще вопрошен будеши:

сократи слово, малыми многая (изглаголи): буди яко ведый и вкупе молчя.

Посреде вельмож не равен творися и иному глаголющу не многослови.

Прежде грома предваряет молния, и прежде стыдливаго предваряет благодать.

Во время воставай, а не последи (иных), в дом отиди и не ленися:

тамо играй и твори помышления твоя, и не согрешай словом гордым.

И о сих благослови Сотворшаго тя и Упоевающаго тя от благ Своих.

Бояйся Господа приимет наказание, и утренюющии обрящут благоволение.

Ищай закона насытится его, и лицемерствуяй соблазнится о нем.

Боящиися Господа обрящут суд и оправдания яко свет возжгут.

Человек грешник укланяется от обличения и по воли своей обретает извинение.

Муж советный не презрит размышления, чуждый же и гордый не убоится страха и по сотворении своем без совета.

Без совета ничесоже твори, и егда сотвориши, не раскаявайся.

На пути падения не ходи и не претыкайся о камение:

не веруй пути, в немже не претыкаешися, и от чад своих хранися.

Во всяцем деле блазе веруй душею твоею, ибо сие есть соблюдение заповедий.

Веруяй закону внимает заповедем, и уповаяй на Господа не умалится.