Премудрость Иисуса, сына Сирахова 34

Тщетны надежды и лживы (суть) неразумиву мужу, и сония вперяют безумных.

Якоже емляйся за стень и гоняй ветры, такожде емляй веру сном:

сие по сему видение снов, прямо лицу подобие лица.

От нечистаго что очистится, и от лживаго кая истина?

Волшебства и обаяния и сония суетна суть, и якоже раждающия сердцу мечтания бывают:

аще не от Вышняго послана будут на посещение, не вдаждь в ня сердца твоего:

многих бо прельстиша сония, и отпадоша надеющеся на ня.

Без лжи совершится закон, и премудрость во устех верных совершение.

Муж ученый уведа много, и многоискусный повесть разум.

Иже не искусися, мало весть: обходяй же страны умножит хитрость.

Много видех во обхождении моем, и вящшая словес моих разум мой:

многащи даже до смерти бедствовах, и спасен бых сих ради.

Дух боящихся Господа поживет, надежда бо их на Спасающаго я.

Бояйся Господа ни чего убоится и не устрашится, Той бо надежда ему.

Боящемуся Господа блаженна душа: чим одержится, и кто ему утверждение?

Очи Господни на любящыя Его: защищение силы и утверждение крепости, покров от вара и покров в полудне, хранение от претыкания и помощь от падения:

воздвизаяй душу и просвещаяй очи, изцеление даяй, живот и благословение.

Иже приносит жертву от неправды, приношение порочно, и не суть во благоволение дары беззаконных.

Не благоволит Вышний о приношении нечестивых, ни множеством жертв очистит грехи.

Яко жряй сына пред отцем его, тако приносяй жертвы от имения убогих.

Хлеб убогим живот убогих, лишаяй его человек кровей есть.

Убивает искренняго отемляй ему поживление, и проливает кровь лишаяй мзды наемника.

Един созидаяй, а другий разоряяй, что успеет более, токмо труд?

Единому молящуся, а другому проклинающу, коего глас услышит Владыка?

Омываяйся от мертвеца и паки прикасаяйся ему, кая польза ему от бани?

Тако человек постяйся о гресех своих и паки ходяй и таяжде творяй, мольбу его кто услышит, и что успе смирением своим?