Премудрость Иисуса, сына Сирахова 36

Помилуй ны, Владыко, Боже всех, и воззри,

и наложи страх Твой на вся языки:

воздвигни руку Твою на языки чужды, и да узрят силу Твою.

Якоже пред ними освятился еси в нас, такожде пред нами возвеличися на них:

и да познают Тя, якоже и мы познахом Тя, яко несть Бога разве Тебе, Господи.

Обнови знамения и измени чудеса,

прослави руку и мышцу десную (Твою), воздвигни ярость и излий гнев,

изми сопостата и сотри врага,

поспеши время и помяни клятву, и да поведят величия Твоя.

Гневом огня пояден да будет спасаяйся, и озлобляющии людий Твоих да обрящут пагубу.

Сокруши главы князей вражиих, глаголющих: несть разве нас.

Собери вся колена Иаковля и наследствуй их якоже от начала.

Помилуй люди, Господи, нареченныя именем Твоим, и Израиля, егоже первенцем нарекл еси.

Ущедри град святыни Твоея, Иерусалим, место покоища Твоего.

Исполни Сиона взяти словеса Твоя, и от славы Твоея люди Твоя.

Даждь свидетелство сущым от начала тварем Твоим и воздвигни пророчествия сущая о имени Твоем:

даждь мзду терпящым Тебе, и пророцы Твои да уверятся.

Услыши, Господи, мольбы молитвенник Твоих, по благословению Аароню о людех Твоих,

и уразумеют вси сущии на земли, яко Ты Господь еси, Бог веков.

Всяко брашно яст чрево: есть же брашно брашна добрее.

Гортань вкушает брашна от лова, тако сердце разумиво словеса ложна.

Сердце строптиво даст печаль, и человек многоискусный воздаст ему.

Всякаго мужеска полу приимет жена: есть же дщерь дщере лучше.

Доброта женска веселит лице и над все желание человеческо предуспевает:

аще есть на языце ея милость и кротость, несть муж ея точен сыном человеческим.

Стяжавый жену начинает имети стяжание, помощника по себе и столпа покою.

Идеже несть ограды, расхищено будет имение, и идеже несть жены, воздохнет скитаяся:

кто бо поверит вооружену разбойнику преходящу от града во град?

Такожде и человеку не имущу гнезда и обитающу, идеже обвечеряет.