Премудрость Иисуса, сына Сирахова 6

И вместо друга не буди враг, имя бо лукаво студ и поношение наследит: сице грешник двоязычен.

Не возноси себе советом души твоея, да не расхищена будет аки юнец душа твоя:

листвие твое пояси и плоды твоя погубиши и оставиши себе яко древо сухо.

Душа лукава погубит стяжавшаго ю и порадование врагом сотворит его.

Гортань сладок умножит други своя, и язык доброглаголив умножит добры беседы.

Мирствующии с тобою да будут мнози, советницы же твои един от тысящ.

Аще стяжеши друга, во искушении стяжи его и не скоро уверися ему:

есть бо друг во время свое и не пребудет во время скорби твоея,

и есть друг пременяяйся во врага и свар поношения твоего открыет,

и есть друг общник трапезам и не пребудет во время скорби твоея:

и во благих твоих будет якоже ты и на рабы твоя дерзнет:

аще смирен будеши, будет на тя и от лица твоего скрыется.

От врагов твоих отлучися и от другов твоих внимай.

Друг верен кров крепок: обретый же его обрете сокровище.

Другу верну несть измены, и несть мерила доброте его.

Друг верен врачевание житию, и боящиися Господа обрящут его.

Бояйся Господа управляет дружбу свою, якоже бо сам, тако и искренний его.

Чадо, от юности твоея избери наказание, и даже до седин обрящеши премудрость.

Якоже оряй и сеяй приступи к ней и жди благих плодов ея:

в делании бо ея мало потрудишися и скоро ясти будеши плоды ея.

Коль стропотна есть зело ненаказанным, и не пребудет в ней безумный:

якоже камень искушения крепок будет на нем, и не замедлит отврещи ея.

Премудрость бо по имени ея есть и не многим есть явна.

Слыши, чадо, и приими волю мою, и не отвержи совета моего:

и введи нозе твои во оковы ея и в гривну ея выю твою:

подложи рамо твое и носи ю, и не гнушайся узами ея:

всею душею твоею приступи к ней и всею силою твоею соблюди пути ея.

Изследи и взыщи, и познана ти будет, и емься за ню не остави ея:

на последок бо обрящеши покой ея, и обратится тебе на веселие.

И будут ти пута ея на покой крепости и гривны ея на одеяние славы.

Красота бо злата есть на ней, и узы ея извитие иакинфово:

во одежду славы облечешися ею, и венец радости возложиши на ся.

Аще восхощеши, чадо, наказан будеши, и аще вдаси душу твою, хитр будеши:

аще возлюбиши слушати, приимеши, и аще приклониши ухо твое, премудр будеши.

Во множестве старейшин ставай, и аще кто премудр, тому прилепися. Всяку повесть божественную восхощи слышати, и притчи разума да не убежат тебе.

Аще узриши разумна, утренюй к нему, и степени дверий его да трет нога твоя.

Размышляй в повелениих Господних и в заповедех Его поучайся присно: Той утвердит сердце твое, и желание премудрости дано ти будет.