Премудрость Иисуса, сына Сирахова 21

Чадо, согрешил ли еси, не приложи ктому, и о преждних твоих помолися.

Якоже от лица змиина, бежи от греха: аще бо приступиши к нему, угрызнет тя:

зубы львовы зубы его, убивающии душы человечи.

Яко мечь обоюду остр всяко беззаконие, ране его несть изцеления.

Прещение и досаждение опустошат богатство: тако и дом гордых запустеет.

Моление нищаго из уст до ушию его, и суд его со тщанием грядет.

Ненавидяй обличения последует грешнику, и бояйся Господа обратится сердцем.

Познан есть издалеча сильный языком, и разумивый весть, егда поползается.

Созидаяй дом свой имением чуждим, якоже собираяй камение на гроб себе.

Изгребия собрана соборище беззаконников, и кончина их пламень огнен.

Путь грешников углажден от камения, а на последок его ров адов.

Сохраняяй закон содержит помышление свое,

и совершение страха Господня премудрость.

Не накажется, иже не есть коварен:

есть бо коварство умножающее горесть.

Разум премудраго яко потоп умножится, и совет его яко источник живота.

Утроба буяго яко сосуд сокрушен и всякаго разума не удержит.

Слово премудро аще услышит разумный, восхвалит е и к нему приложит: услыша е буй, и не угодно ему бысть, и обрати е за плещы своя.

Повесть буяго яко бремя на пути: во устнах же разумнаго обрящется благодать.

Уста премудраго взыщутся в собрании, и словеса его размышлена будут в сердцы.

Якоже дом разорен, тако буяго премудрость, и разум неразумнаго неиспытны глаголы.

Пута на ногах неразумевающым наказания, и яко ручнии оковы на руце десней.

Буй во смехе возносит глас свой, муж же разумный едва тихо осклабится.

Якоже утварь златая мудрому наказание, и якоже обручь на десней мышце его.

Нога буяго скора в дом, человек же многоискусный усрамится от лица.

Безумный дверьми приничет во храмину, муж же наказан вне станет.

Ненаказание человеку слушати при дверех, мудрый же отяготится безчестием.

Устне многоречивых не своя си поведят, словеса же мудрых в мерилех станут.

Во устех буих сердце их, в сердцы же премудрых уста их.

Кленущу нечестивому сатану, сам кленет свою душу.

Сквернит свою душу шепотливый, и где либо жити имать, возненавиден будет.